स्पष्ट दिशा, ठाम संकल्प आणि नवी उमेद..  ही फक्त एक घोषणा नाही, तर नाशिकच्या वास्तवाचा प्रामाणिक स्वीकार आणि पुढील प्रवासाची स्पष्ट दिशा आहे. एक वास्तव हे आहे कि एकविसाव्या शतकातलं पाव दशक संपलं, परंतु  नाशिक ज्या वेगाने पुढे जायला हवे होते, त्या वेगाने गेले नाही. संधी होत्या, क्षमता होती, माणसं होती – पण ठोस दिशा, सातत्यपूर्ण नियोजन आणि परिणामकारक अंमलबजावणीचा अभाव राहिला.

या काळात जगातील अनेक शहरांनी दीर्घकालीन दृष्टिकोन ठेवला, पायाभूत सुविधा उभ्या केल्या, शिक्षण–तंत्रज्ञान–उद्योग यांची सांगड घातली आणि नागरिकांचे जीवनमान टप्प्याटप्प्याने उंचावले. आपण मात्र अनेकदा तात्कालिक निर्णयांमध्ये अडकलो, पुढील पिढ्यांचा विचार मागे पडला आणि त्यामुळे नाशिकची प्रगती थांबली नाही, पण अपेक्षेइतकी झालीही नाही हीच खरी वेदना आहे.

आता प्रश्न असा नाही की काय गमावलं, तर प्रश्न आहे की आता काय करायचं. नव्या वर्षाची सुरुवात ही स्वतःला दोष देण्यासाठी नाही, तर नव्याने उभं राहण्यासाठी आहे. आता नाशिकला फक्त मागे राहिलेली अंतरं भरून काढायची नाहीत; तर नियोजनबद्ध विकास, आधुनिक तंत्रज्ञान आणि नागरिककेंद्रित प्रशासनाच्या बळावर जगातील सर्वोत्तम शहरांच्या पुढे जाण्याची क्षमता निर्माण करायची आहे.

नवे संकल्प म्हणजे केवळ घोषवाक्य नाहीत, ते दीर्घकालीन विचार, मोजता येणारी उद्दिष्टं आणि ठराविक कालमर्यादेत दिसणारे परिणाम आहेत. नवी उमेद म्हणजे आंधळी आशा नाही, ती अनुभवातून आलेला आत्मविश्वास आहे. आणि नवी झेप म्हणजे अचानक उडी नाही, ते मजबूत पायावर उभं राहून टाकलेले ठाम पाऊल आहे.

हे वर्ष आणि आगामी कालखंड नाशिकसाठी केवळ नवीन पान नाही, तर हरवलेला वेळ भरून काढत, पुढील पिढ्यांसाठी भक्कम भविष्य घडवण्याची संधी आहे. आता आपल्याला फक्त पुढे जायचं नाही, तर योग्य दिशेने, योग्य वेगाने आणि योग्य नेतृत्वाखाली पुढे जायचं आहे. 

चला तर मग आपला पारंपरिक वारसा जपतांनाच नाशिकला एक जागतिक दर्जाचे, समस्यारहित व नाविन्यपूर्ण शहर बनवू या